ZOOM

гэты дом паўстае

над тэрмальнымі водамі

на скале дзе заўжды зелянее трава

тут ні сцежак няма

ні дарог-пераходаў

каб адолець каменны

круты перавал

сонца позна сядае паглядвае коса

тут сутонню глыбокаму наперакор

на паляне накрыта

і поўніцца посуд

а жывых і няма толькі пахне чабор

толькі чайкі ўгары медытуюць

на ветры

ім адтуль бачна ўсё — берагі акіян

а ніжэй нібы мла закісае паветра

і паўзе між камення вячэрні туман

чайкі бачаць скалу і будынак

на строме

і драбнюткаю соллю пасыпаны стол

і пад соллю чарнільная

літараў роўнядзь

незнаёмых

чужых

неразгаданых

слоў